DD's 133th Day

今日終於都有時間上返去呢個Blog度解釋下冬冬發生左咩事。

星期六朝早，冬冬仲好精神活潑，我諗住佢又打齊晒針，帶佢出去同其他狗玩下，唔駛再成日困住屋企咁悶啦。佢早上仲活躍到自己跳入袋度，由我屋企去到九龍灣個petshop，大約一小時多。我放冬冬落地時，佢仲好精神。佢又跟住我，我又一路行，一路睇下買邊個袋比冬冬好。整個過程都係大約20分鐘到。突然我聽到冬冬大嗌，佢走得太近比人踢親一野，不過奇在佢幾分鐘後突然嘔吐。我初時以為佢暈車浪，因為之前都試過，但都覺得有點奇怪，因為冬冬平時暈完車浪都會食野，但今次竟然唔食﹗我以為佢暈車浪唔舒服，佢幾個鐘都好靜，好驚，好唔尋常。當日下午返到屋企，佢繼續嘔，仲唔只一次。我開始好擔心‥但認為可能係腸胃炎，book定醫生，諗住睇下佢第二朝會唔會好返，如果好返就唔睇，未好就睇。我見到佢咁既樣好辛苦，超心痛。又怕佢再嘔，唯有少少水咁比佢飲，減低佢脫水情況出現。

星期日早上， 冬冬仍然係好唔舒服，我真係越來越驚，帶佢去美孚睇獸醫。因為冬冬第2次的嘔吐物有一條繩的物體，獸醫懷疑有野塞左佢腸裡面導致嘔吐，所以建議照X光。照左X光見到好似有個影。坦白說，我覺得係有個影，但唔係太明顯。我建議幫冬冬驗埋血，醫生開左D藥比佢止嘔，諗住等第二日再照X光，睇下條異物有冇移到位。當晚冬冬仍然係好唔舒服，我好擔心，SET左ALARM每半小時起身一次餵冬冬飲電解水。因為飲得太多佢又嘔，唔飲佢又脫水，而且佢兩日未食過任何野喇。我成晚就係咁睇住佢，但仍然冇好轉過。

星期一早上，我一早就帶左冬冬去照多次X光。醫生餵冬冬食左顯影劑，如果真係有異物，再照X光就會睇到。但一直落到大腸，都見唔到有任何異樣。同時冬冬驗血報告出左，發現佢肝酵素上升左十倍。醫生就覺得奇怪，開始懷疑可能係肝問題，不過都唔係肯定，仲建議冬冬留一晚醫院。但因為美孚獸醫個度唔係24小時，冬冬晚上會冇人睇住，我會好擔心，所以即時叫診所比晒冬冬D病歷我，我即時又搵到一間係太子24小時的獸醫診所。
星期一晚上，我一路等，一路喊，冬冬真係好唔舒服。終於到等到見醫生啦，醫生睇完冬冬X光，發覺佢個肚有D朦，懷疑有腹水。但建議冬冬一定要留醫，之後幫冬冬照超聲波。個陣我已經離開左醫院，姑娘即刻打返電話比我話冬冬真係有腹水。明天醫生會見我講解冬冬既情況。

星期二下午，我放工就去見獸醫。醫生話冬冬個肝嚴重發炎，應該係急性肝炎，但未知係因為中毒定係病毒引起。但係冬冬已經注射晒疫苗，而且冇同過其他狗接觸。如果係病毒，應該係有潛伏期，但冬冬即時係唔舒服，醫生覺得冬冬係PET SHOP舔到D野而中毒。我問醫生冬冬會唔會有危險，醫生又冇答到我，只係話如果肝炎而產生腹水已經去到一個嚴重既情度。但係幫到冬冬既只有一種叫做『支持療法』，即係吊鹽水同食藥。希望到星期五再驗血時，佢個肝酵素會回落。我可以做的，只有等同埋日日去探冬冬了‥

星期三至五，我都係放左工就去探冬冬。星期五早上約左醫生聽冬冬驗血報告，等真係一種折磨﹗終於都見醫生，而報告出左話冬冬肝酵素已經回落，由10倍降到4倍，都已經係一大進展。但因為肝炎傷及其他器官，其他指數都唔太正常，我同醫生講想冬冬留醫多一個星期，再驗多次血，等佢好返多D我先安心接佢走。

星期六我探冬冬，佢精神番好多啦。我終於都鬆一口氣﹗希望佢一個星期後會好番啦。

順便提一提，我之前只求搵一間24小時的獸醫，第一次打黎CAU，助護聽電話已經好有耐性，又好有禮貌，又提晒我有D咩要帶同要做，而且好急咁BOOK都有位去睇醫生。反而另一間非弁利聽電話又冇乜點理我，又要我等好耐先答我一樣野，到最後又唔覆我電話。兩間聽電話既質素都好大分別﹗可能非弁利平，多人睇啦。

冬冬而家係睇太子CAU馮醫生。醫生好好人又好細心，每次同我解釋冬冬病情，都會好細心同詳盡。絕對唔會因為出面有好多人等緊，佢會好趕咁同我解釋晒就睇下一個症。當醫生有時間，都會出黎睇睇每隻動物既進展，我係度時，佢會好細心咁UPDATE番比我知冬冬既情況。除左醫生之外，所有助護都好好人，我問野都好細心咁解答，有咩情況都會即時打電話比我，冬冬悶時又會放佢出黎玩同佢傾計，真係幫到我呢個又緊張又擔心既人好大既忙﹗超級感謝﹗